रस्तेबांधणीतच झाडांसाठी जागा

चक्रीवादळाच्या तडाख्यामुळे मुंबईत अनेक पडल्याचे समोर आले. अनेक ठिकाणी अजूनही तक्रारींची दखल घेतलेली नाही, असेही नागरिकांचे म्हणणे आहे. - सोमवारी महापालिकेकडे झाडे पडल्याच्या अनेक तक्रारी आल्या. मात्र पावसामुळे सगळीकडे कर्मचारी पोहोचू शकले नाहीत. सगळ्या विभागांचा आढावा घेतल्यावर मंगळवार संध्याकाळपर्यंत सुमारे ३ हजार तक्रारी आमच्याकडे आल्याचे निदर्शनास आले आहे. मंगळवारपासून कामाला वेग आला असून, यातील ७० टक्के ठिकाणी कर्मचारी पोहोचले आणि त्यांनी तक्रारीचे निवारण करण्याचा प्रयत्न केला. रस्त्यातील अडथळे हटवण्याचे काम प्राधान्याने करण्यात येत आहे. इमारतींमधून आलेल्या तक्रारींसाठीही कर्मचारी पोहोचले आणि त्यांनी पडलेल्या फांद्या कापून बाजूला केल्या. या फांद्या सध्या इमारत परिसरातच असून त्या हटवण्याचे कामही लवकरच करण्यात येईल. - महापालिकेचे किती कर्मचारी सध्या या तक्रारींचे निवारण करण्यासाठी कार्यरत आहेत? - सध्या सगळ्या विभागांमध्ये मिळून ८०० ते १००० कामगार काम करत आहेत. डम्पर, क्रेन, जेसीबीने झाडे उचलून बाजूला केली जात आहे. इलेक्ट्रिक करवतीनेही, पेट्रोल करवतीनेही काम सुरू आहे. - मुंबईत अनेक ठिकाणी पावसाळ्यात काँक्रिटीकरणामुळे झाडे पडल्याचे निदर्शनास आले आहे. मुंबईला सलग दुसऱ्या वर्षी चक्रीवादळाचा तडाखा बसला आहे. येत्या काळात अरबी समुद्रामध्ये चक्रीवादळाचे प्रमाण वाढू शकते, अशी शक्यता असताना काय काळजी घेण्यात येत आहे? - दोन वर्षांपूर्वी रस्ते विभागाला उद्यान विभागाकडून नोटीस पाठवण्यात आली आहे. जिथे रस्ते बांधले जात आहेत, त्याच्या बाजूला झाडांसाठी एक मीटर बाय एक मीटर जागा सोडावी. या पद्धतीने नवीन रस्तेबांधणीमध्ये जागा सोडली जात आहे. त्याचसोबत जिथे काँक्रिटीकरण झाले आहे, तिथे काँक्रिट तोडून माती घालण्याचे कामही करत आहोत. - ज्या ठिकाणी झाडे पडली, तेथे आता पुन्हा वृक्षारोपण करण्यात येईल का? मुळासकट उपटलेल्या झाडांचे पुनर्रोपण शक्य आहे का? - हे सगळ्या ठिकाणी शक्य नाही. अनेक ठिकाणी झाडांना पुरेसा आधार नाही. मैदानांभोवती, उद्यानात मुळांसकट पडलेल्या झाडांचे पुनर्रोपण करता येईल. हे काम लगेच व्हायला पाहिजे. सध्या तरी यातील किती झाडांचे पुनर्रोपण करता येईल, याचा अंदाज नाही. दोन दिवसांमध्ये कोणत्या ठिकाणी पुनर्रोपण करण्यात आले, त्याचा अंदाज येईल. साफसफाई करून, किती झाडे पडली याचा आढावा घेऊन त्यानुसार येत्या पावसाळ्यामध्ये वृक्षारोपण केले जाईल. यासाठी विभागवार उपक्रम राबवण्यात येईल. - अनेक ठिकाणी गुलमोहराची झाडे पडलेली दिसत आहेत... - होय. आम्ही गेल्या वर्षीपासून गुलमोहर वृक्षारोपणाच्या मोहिमेतून वगळला आहे. त्याऐवजी मूळ भारतीय झाडे लावण्यासाठी प्रयत्न करत आहोत. वृक्ष प्राधिकरणाच्या बैठकीत आपण त्याला मान्यता घेऊन सगळ्या विभागांकडे त्याची माहिती पाठवली आहे. पर्यावरणप्रेमी, विद्यार्थीही वृक्षारोपण मोहिमेमध्ये संबंधित विभागाशी संपर्क साधून सहभागी होऊ शकतात. (संकलन - अनुजा चवाथे)