बीडमधील माजी सैनिकाचा व्हेंटीलेटरअभावी मृत्यू

मुंबई : देशातील काही राज्यात करोनारुग्णांचे उपचारांअभावी होणारे हाल, मृत्यू, अंत्यसंस्कारांसाठी नातेवाईकांची धावपळ होत असल्याच्या पार्श्वभूमीवर, महाराष्ट्रातील आरोग्य व्यवस्था अधिक सक्षम असल्याचे चित्र निर्माण झाले आहे. मात्र मुंबईसारखी प्रमुख शहरे सोडल्यास ग्रामीण भागात करोनारुग्णांना सुविधा मिळण्यात प्रचंड अडचणी येत असल्याचीही काळी बाजू समोर येत आहे. बीडमध्ये करोनाग्रस्त झालेले हरिभाऊ मोठे (७५) यांना व्हेंटीलेटर खाट न मिळाल्याने त्यांचा मृत्यू ओढवला. संपूर्ण जिल्ह्यात १० दिवस शोधाशोध केल्यानंतरही व्हेंटीलेटर बेड न मिळाल्याने त्यांना पुण्याला नेले जात असतानाच, प्रवासात त्यांचे निधन झाले. राज्यात करोनाने थैमान घातले असून आरोग्य यंत्रणेवर त्याचा भार आला आहे. पायाभूत सुविधा, ऑक्सिजन-व्हेंटीलेटरची कमतरता आणि रुग्णसंख्येचे गणित जुळवताना आरोग्य विभागाची तारांबळ उडाली आहे. आवश्यक वैद्यकीय सुविधांची कमतरता निर्माण झाल्याने राज्यातील विविध भागातील रुग्णांना त्याचे असह्य चटके बसत आहेत. मुलुंड, विरार, नाशिकमधील रुग्णालयांत आग लागण्यापासून ते ऑक्सिजन गळतीपर्यंत अनेक दुर्दैवी घटनाही समोर आल्या आहेत. त्यातच व्हेंटीलेटर बेडअभावी बीडमधील हरिभाऊ मोठे यांची मृत्यूशी झुंज गुरुवारी अपयशी ठरली. बीडमधील गेवराई येथील राक्षस भुवन गावात राहणारे माजी सैनिक हरिभाऊ मोठे यांना १ मे रोजी करोनाची बाधा झाली. बीड जिल्हा रुग्णालयात एकही बेड उपलब्ध नसल्याने त्यांना नगर रस्त्यावरील एका खासगी रुग्णालयात दाखल केले गेले. त्यांना श्वास घेण्यास त्रास होऊ लागल्याने व्हेंटीलेटर बेडची व्यवस्था असलेल्या रुग्णालयाचा शोध सुरू झाला. मात्र देशासाठी सीमेवर प्राण पणाला लावणाऱ्या मोठे यांना उत्तरायुष्यात उपचारांसाठी व्हेंटीलेटर बेडदेखील मिळणे दुरापास्त ठरले. मोठे यांचे नातू रवी यांनी शोधाशोध सुरू केली. परंतु, सतत १० दिवस धावपळ करूनही बीडमध्ये व्हेंटीलेटर बेड नसल्याने कुटुंबीय हतबल ठरले. या कालावधीत मोठे यांचा त्रास वाढला. त्यामुळे अखेर त्यांना पुण्यातील लष्करी रुग्णालयात हलवण्यासाठी गुरुवारी अॅम्ब्युलन्सची व्यवस्था केली गेली. मात्र, पुण्याच्या दिशेने जात असतानाच मोठे यांनी अॅम्ब्युलन्समध्येच नातवासमोर प्राण सोडले. या संपूर्ण घटनाक्रमात मोठे यांच्या कुटुंबीय, स्नेहींनी सरकारी पातळीवरही बराच पाठपुरावा केला. माजी सैनिकास तरी सुविधा मिळेल, या आशेवर त्यांचे प्रयत्न सुरू होते. पण ते सारे प्रयत्न फोल ठरले.