डॉ. मुणगेकर यांच्या कर्तृत्वाचा ठसा अविस्मरणीय;बाळासाहेब थोरात यांचे गौरवोद्गार

म. टा. प्रतिनिधी, मुंबई 'ज्येष्ठ अर्थतज्ज्ञ हे एक समृद्ध जीवन जगले. भारताच्या कृषी मूल्य आयोगाचे सदस्य, मुंबई विद्यापीठाचे कुलगुरू, योजना आयोगाचे व नंतर राज्यसभेचे सदस्य अशा ज्या पदांवर त्यांनी कार्य केले, तिथे त्यांनी आपल्या कर्तृत्वाचा ठसा उमटवला', अशा शब्दांत राज्याचे महसूलमंत्री यांनी डॉ. भालचंद्र मुणगेकर यांचा गौरव केला. 'मी असा जगलो' या मुणगेकर यांच्या आत्मचरित्राच्या उत्तरार्धाचे प्रकाशन मान्यवरांच्या हस्ते रविवारी मुंबईत पार पडले. त्याप्रसंगी प्रमुख पाहुणे म्हणून ते बोलत होते. जागतिक कीर्तीचे भाषातज्ज्ञ प्रा. गणेश देवी, माजी कुलगुरू व ज्येष्ठ साहित्यिक डॉ. नागनाथ कोतापल्ले आणि जेष्ठ साहित्यिक लक्ष्मीकांत देशमुख यांनी प्रमुख वक्ते म्हणून पुस्तकाविषयी आपले मनोगत व्यक्त केले. 'मी असा जगलो'मध्ये एका प्रगल्भ व्यक्तिमत्त्वाचे झपाटून टाकणारे दर्शन होते, असे प्रा. गणेश देवी म्हणाले. तर या पुस्तकात आपल्या जीवन मूल्यांशी कसलीही तडजोड न करणारा कृतीशील विचारवंत आपल्याला दिसतो, असे वर्णन प्रा. कोत्तापल्ले यांनी केले. कल्याणकारी राज्यव्यवस्था दृढमूल करण्यासाठी डॉ. मुणगेकर यांनी योजना आयोगात केलेले कार्य अधोरेखित झाले आहे, असे उद्गार देशमुख यांनी काढले. हे आत्मचरित्र म्हणजे माझ्या कृतीशील आयुष्याचे आत्मपरीक्षण आहे, असे डॉ. मुणगेकर यावेळी म्हणाले. सुशील मुणगेकर यांनी कार्यक्रमाचे सूत्रसंचालन केले आणि प्रकाशक 'लोकवाङमय'चे राजन बावडेकर यांनी आभारप्रदर्शन केले.