लशीसाठी पालिकाही मागवणार जागतिक निविदा

म. टा. विशेष प्रतिनिधी, करोना साथ आटोक्यात आणण्यासाठी लसीकरणावर भर दिला जात असतानाच, मुंबईत गेल्या अनेक दिवसांपासून लस उपलब्ध न होण्याची सर्वात मोठी तक्रार निर्माण झाली आहे. लशीचा पहिला तसेच दुसऱ्या डोस घेण्यासाठी मुंबईकरांना बराच आटापिटा करावा लागत आहे. ही परिस्थिती नियंत्रणात आणण्यासाठी मुंबई पालिकेने लस खरेदीसाठी जागतिक निविदेचा निर्णय घेतला आहे. येत्या दोन दिवसांतच लस खरेदीसाठी काढण्यात येणार आहे. त्यानुसार, मुंबईत साधारण जूनच्या पहिल्या आठवड्यापर्यंत लशींचा मुबलक साठा उपलब्ध होणार असल्याचे पालिकेचे म्हणणे आहे. लसीकरणाचा वेग सध्या कमी झाल्याने मुंबईकरांमध्ये नाराजी आहे. लस मिळत नसून दुसरा कोणताही पर्याय नसल्याची तक्रार आहे. लशींच्या तुटवड्याने निर्माण झालेली स्थिती पाहून मुंबई महापालिकेने लस पुरवठ्यासाठी जागतिक निविदा मागविण्याचे ठरविले आहे. मुंबईत सध्या कोव्हॅक्सिन, कोव्हिशिल्ड लशींचा पुरवठा होत असून, जागतिक निविदा प्रक्रिया पूर्ण झाल्यानंतर त्यात इतरही लशींची भर पडेल. त्यात फायजर, जॉन्सन अँड जॉन्सन, स्पुटनिक, मॉडर्ना अशा चार कंपन्यांचा समावेश असेल. ५० लाखांहून अधिक डोस देणाऱ्या कंपनीकडून लस खरेदी केली जाणार आहे. त्या साठ्याच्या सहाय्याने लसीकरणास आणखी वेग देण्याचा पालिकेचा प्रयत्न आहे. मुंबईत आतापर्यंत २८ लाख लशी देण्यात आल्या आहेत. सुरुवातीस लसीकरणाचा वेग समाधानकारक होता. मात्र लशींच्या पुरवठ्याअभावी हा वेग घसरत चालला आहे. जागतिक निविदेतून लशींचा तुटवडा भरून काढण्याचा प्रयत्न केला जात आहे. गटनेत्यांच्या बैठकीत एकमत मुंबई पालिकेच्या गट नेत्यांच्या सोमवारी झालेल्या बैठकीत लसीकरणाविषयी चर्चा झाली. त्या बैठकीत महापौर किशोरी पेडणेकर, उपमहापौर अॅड. सुहास वाडकर, स्थायी समिती अध्यक्ष यशवंत जाधव, सभागृह नेत्या विशाखा राऊत, विरोधी पक्षनेते-काँग्रेसचे गटनेते रवी राजा, राष्ट्रवादी काँग्रेसच्या गटनेत्या राखी जाधव, सुधार समिती अध्यक्ष सदानंद परब, समाजवादी पक्षाचे रईस शेख उपस्थित होते. या बैठकीत आयुक्त इक्बालसिंह चहल यांनी जागतिक निविदेतून लस साठा मिळविण्याबाबत माहिती दिली. त्यावेळी, पालिकेकडून लस खरेदीविषयी जागतिक निविदा मागविण्याच्या निर्णयास गटनेत्यांच्या बैठकीत एकमताने पाठिंबा देण्यात आला.